03/19/2024
A posta en marcha da facturación electrónica obrigatoria en España durante os próximos dous anos suporá un cambio drástico na forma de operar de autónomos e empresas. A continuación, resumimos os 10 puntos principais que traerá este sistema:
- Só para operacións en España
Aplícase a clientes e operacións que teñan lugar en territorio nacional. Non afectará ás transaccións intracomunitarias nin ás importacións ou exportacións con terceiros países. - Software específico de facturación electrónica
Non serán válidos formatos como Excel, Word ou PDF. As facturas deben xenerarse nun formato estruturado (por exemplo, XML ou Facturae) e emitirse a través dun software de facturación compatible. - Programas de facturación interconectados
A normativa prevé que exista unha conexión entre os distintos softwares de facturación (privados e públicos) para crear un Sistema Español de Factura Electrónica, xestionado por unha plataforma pública e supervisado pola Axencia Tributaria. - Haberá unha solución pública gratuíta
Os autónomos poderán optar por empregar programas de facturación privados ou acudir a unha ferramenta gratuíta que a Axencia Tributaria porá á súa disposición. - Con copia a Facenda
As facturas xeneradas desde un software privado deberán remitirse tamén á Axencia Tributaria a través da plataforma pública de facturación electrónica. - Facer público o punto de entrada de facturas
Os autónomos deben indicar aos seus provedores (e na súa web, se a teñen) cal é o seu punto de entrada de facturas electrónicas. Se non se indica, considerarase que o punto de entrada é a solución pública. - Obrigatorio informar dos pagos
Tanto autónomos coma clientes deberán reportar o estado das facturas e o momento en que se realiza cada pago. Esta obriga atrasarase de 3 a 4 anos para aqueles empresarios e profesionais cunha facturación anual por debaixo dos 6 millóns de euros. - Sancións para a morosidade
Un dos obxectivos da nova lei é reducir a morosidade. O atraso nos pagos por riba dos 60 días poderá levar consigo medidas punitivas, como a denegación de subvencións ou multas a empresas con contratos públicos. - Sinatura dixital obrigatoria
Toda factura electrónica deberá ir asinada cunha sinatura electrónica avanzada. - Certificado dixital ou DNI electrónico obrigatorio
En consecuencia, será necesario dispoñer de certificado dixital ou DNI electrónico, que se integrará no software de facturación.
Espérase que estas medidas entren en vigor de maneira xeneralizada en 2026, polo que é aconsellable adiantarse e empezar a familiarizarse canto antes coa facturación electrónica. Contar cun bo software e cunha asesoría profesional serán pasos clave para que a transición sexa o máis fluída posible.